"شيابنا" ضاع عمرهم بالعسكرية و الحصار و "شياب الكراسي" ضاع عمرهم بين إيران و سوريا و الأردن و بريطانيا.

"شيابنا" انعدموا و انسجنوا و ماتوا من المرض و "شياب الكراسي" محد يعدمهم و يسجنهم و عدهم فلوس تعالجهم بأحسن المستشفيات 

"شيابنا" جانوا يشربون حتى ما ينعلسون و لازم يصلون و يكفرون عن ذنوبهم حتى لا ينعلسون و الله يعاقبهم و "شياب الكراسي" جانوا يصلون و هسه كرشوا من الشرب.

"شيابنا" يشتغلون حتى يأمنون مستقبل ولدهم و بناتهم و "شياب الكراسي" الخير يكفي و زايد. 

"شيابنا" جلطة وحدة نخسرهم و "شياب الكراسي" ثلاث جلطات و بألمانيا يرجعون طبيعيين و يرجعون للعملية السياسية

"شيابنا" يوصلون للسبعين ما يكدرون يتحركون و "شياب الكراسي" بالسبعين يفكرون يرشحون ب2018.

"شيابنا" شفناهم خلصوا و كلها راحت و "شياب الكراسي" ما راح واحد منهم و اظن عزرائيل مغلس عليهم.