لم يستوعب بعد انه اصبح سابق ولم تعد كلمة (دولة رئيس الوزراء ) تسبق اسمه ولهذا لم يتوقف عن الخرط كل يوم اربعاء فهو لا زال يعيش اثار صدمة اخراجه من موقعه ولذا لازال يعيش التاريخ بكل تفاصيله حيث يقوم في الصباح مبكرا ليسأل عن مواعيده لقاءاته لليوم فيقولون له لاتوجد مواعيد لان الكل يتصل بمكتب رئيس الوزراء الحالي فيصبح عصبيا ويربرب ليقول له النسيب لاتهتم حجي بعد اربع سنوات ناكلهم اكل هاي اذا خليناهم يكملون فياتي صوت نسائي يقول الله يسمع من حلكك .
يسال هل وصل الصحفيون ووسائل الاعلام فيقولون له لم ياتي الا ابو افاق ومندوب الشبوط فيقول بس هذولة ؟ ليش ما خبرتوا البقية فيقولون له كلهم مجتمعين قرب مكتب العبادي فيقول زين خلوا يرحون بعدين احنا ندزلهم الخبر فيقف امام المنصة والكراسي كلها خالية امامه الا من المصور التلفزيوني ومرافقه الذي يقول له تفضل حجي راح نسجل فيبدأ يقترح و يشكل ويؤسس وينصح ولكنه خانس لا يتوعد ولا يهدد لانه يعلم بان الكل سيضحك وعندما يرى ان المصور ينظر الى مكان اخر وليس اليه يشعر بانه حتى المصور لعبت نفسه من الخرط فينتهي من كلامه ووجه احمر .
عزيزي رئيس الوزراء السابق نعم السابق والله صرت سابق وما بيها شي كل واحد يروح من عنده المنصب وانت لو تبطل من خرط الاربعاء احسن لان على الاقل تكدر تاكل سمج سمك لان اذا عصبي وتاكل سمج يصير عندك بهاق حسب ما يكولون وترتاح وخلي المشاكل على الجديد .
بالمناسبة ما شفت الجماعة اجتمعوا وانت لا دعوك ولا خبروك وهاي ما كافية حتى انت تعرف بانك لست اكثر من نائب في البرلمان فدخيلك حجي اقتنع بالواقع والله يحترموك ويقدروك اكثر من هسه وخرط الاربعاء يعني مو كافي يجتمعون الجعفري والجلبي وعلاوي وعبد المهدي وانت لا تدري ولا تعرف ولا راح احد يخبرك عدا اللي تسمعه بالاعلام وخصوصا اجتماعهم يوم الاربعاء اي موهاي رسالة الك حتى تعرف انك اصبحت سابق بكل شيء حتى بالاستشارة فبعد شنو تعين وتشكل وتنصح ؟
حجي علمود صحتك وكرامتك وحتى مو مثلي وامثالي نكتبلك ونكلك اسكت كافي لان اذا كل نائب يسويله خطبة كل اسبوع راح القضية تصير بايكه هوا وداعتك . اتمنى اربعاء الجاي تلغي الموضوع وتفكر شويه وتشوف غير شغله لان الجماعة ناوين يشتغلون ويصلحون كل اغلاطك فلا تزيدها ورحم الله من جب الغيبة عن نفسه .
( بالمناسبة تره كل اللي جانوا لوكية داير مادايرك كاموا يرسلون رسائل لغيرك يقولون فيها احنا بالخدمة حاضرين وكلنا جنود واشكد نصحنا لكن ما فاد جان يمشي برايه وراي نسبانه وابنه فدخيلك بطل شغلة الاربعاء لان هي بوقتها جانت خرط هالمرة وانت سابق ؟ وبعدين هذولة اللي تتصل بيهم وتكول لهم سووا فلان شيء او ابعثوا لي فلان تقرير اول ما يسدون التلفون يكولون زين حجي احجيلك وياه وتره هاي فشله وجبيرة بحقك حجي )