١- أفضل طريق للهجرة UN وإن طال.
٢- أخطر طريق البحر، مجازفة كبيرة.
٣- لا تأمّن بمهرّبچي حتى لو كان أبوك.
٤- لا تدفع قبل لا توصل..اتفقوا على طرف ثالث.
٥- لا تغيّر بشكلك وتصبغ شعرك اصفر بدافع التخفّي لأن العراقي ذاك هو مبيّن املح اچلح.
٦- اختار بلد فاتح باب اللجوء.لا تتورط.
٧- أوراقك،مستمسكاتك،هويّاتك، اثباتاتك طلّعهن قبلك بالبريد لمعارفك البرّه ومن توصل اسحبهن.
٨- خلّي ببالك أن أيّ قضيّة ماتخصّك بشخصك ماراح ياخذون بيها. يعني اذا تگول شارد لأن البلد مشتعل ماراح ينطوك لجوء لو توذّن.
٩- حضّر وثائق وأدلّة تثبت أن حياتك انت - مو اخوك ولا ابوك ولا خالتك - بخطر، واذا ما عندك وثائق لاتفكر بالسفر من الأساس لأن راح تنرفض.
١٠- خلّي ببالك ايضاً ان عليك تثبت بالدليل أن حياتك بخطر في كل مكان بالعراق، لأن راح تنسأل سؤال مباغت هو: ليش ما انتقلت الى منطقة آمنة بالعراق مثل كردستان؟ شراح تجاوب ياذكي؟ واحد جاوبهم لأني ما اعرف أحچي كردي، گالوله: ليش الوالدة سويديّة مثلاً؟ وذاك هو يسمع حسّكم بالتسفيرات.
١١- لا تراوغ ولا تتحاذق ولا تألّف، احچي مشكلتك بس، لأن الشرطة هنا مفتشة باللبن، ولا يهون عدنان الأسدي.
١٢- مراكز استقبال اللاجئين راح تراويك اشكال وانواع، منها مثلاً أن تجبر على العيش مع شخص جاي من الكونغو ويعتبر الثلاجة كنتور، عادي لا تتفاجأ. ولا تستغرب اذا شفته الصبح موكّر مثل الديچ فوگ مقعد التواليت الغربي يقضي حاجة والباب مفتوح، كولش عاتي لذلك حاول تدفع بالتي هي احسن لأن أي مشكلة راح تتسجّل بملفّك وتأثّر عليك.
١٣- مادامك ناوي على السفر سدّ الفيسبوك و روح تعلّملك كم جملة انگليزي يفيدنّك بالطريق وبمركز ايواء اللاجئين.
١٤- اذا حصّلت على الإقامة راح تطبّ كورس لغة ما أوصيك هلّله هلّله بأهلك وسمعة بلدك مو تطلعهم جهلة وكلشي ميفتهمون عبالك راح تتقرّب لمواطنيك الجدد، بالعكس راح يكرهوك ويعتبروك بذّات وعديم الوفاء.
١٥- لو بيدي ما انصحك تهاجر لأن حياتك راح تنگلب فوگاني تحتاني وما راح اگلّك شلون، بعدين تتذكرني، لكن تجربتي بالحياة علّمتني شغلتين اذا العراقي قرّر يسوّيهن مايعدل عنهن لو يجي القوبيس: العرس والسفر. لذلك أتمنالك توصل بالسلامة وتحصل اقامة بدولة تحترم انسانيتك وتعوّضك عن سنوات الجمر العراقي.

اخوك في الإنسانيّة أزهر جرجيس