الدنيا مگـلوبه وصويحبنا (جون كيري) يتخّم بـ هانولولو ويّه صديقاته , أبن المشهوره جاب الخطه وطفر مثل الزنبرك والشعب العراقي مذبوب عَ الشحن مثل جدر البهلول والأكله كلاوات مجرد طبخ حصو ماوراها بس حركَ الوقت والضحايا , والصوچ موصوچه للرجال وروح شلال , أجا بالعيني وأغاتي وطلب تفويض و رغم المخاسير گـال أطلعكم من هاي الچيحه الخايسه , بس ربعنا الحبابين دوّخوه واحد يجر بالطول و اللاخ بالعرض و كلها صايره شيوخ تحچي بالنيابه عن الشعب العراقي , يعني بالعربي شليله و ضايع راسها وهو ماله خلكَ لهيچ طلايب و مسامع بحياته صوت الربابه , رجال تأملي ومرهف والوقت عنده من ذهب , هدفه واضح بالحياة يريد يلم شكم فلس ويصرفهن ع الونسه والحفلات لما يطلع تقاعد , لگاها من الله على الله لأن منّاك رئيسه الشفيّه أوباما فد واحد عجوزي وفاهي ويدفع بيها بعود ومايريد ينشغل عن ميشيل ويعوف طلعاته وشغلاته , عمي حقّه هي الحرب لعب چعاب , هاي بلوه چبيره بيها تموت ناس وتنهزم عالم وتتفلش بيوت و تتغير خرايط , وأكيد محّد يريدها لأن ماوراها بس البلاوي و الخساير مو فلس وفلسين , سبع ملايين ونص يوميه , يعني مصرف مال أربع خمس حجّاج لأسبوع مدري شهر كامل .

أي عمي طيح طيح للگـاع وأستمتع بحياتك وأنعل أبو العوز لابو المجاريد المادبروا خلاصهم وخلينا بصريختنا ما نعرف العدو من الصديج صايرين مثل المصاليخ المتلغمطين بالصابون بحمام الحيدري ماعدهم غير الدعاء و كلهم يتثاوبون عسى ولعل بلكي تمطر لو يجيهم مي الأساله , واحد يصدر بيانات من الحمام و واحد يلعب طم خريزه ويّه جماعته و راحت الوادم بالرجلين وأولهم ولد الخايبه 

أحضر يمعوّد نعتاز أيامك , عمي كيري يابعد طوايفي بس تعال أحنا بشاربك !