تحسين ابو الليل فيترچي يريد يتزوج صابرين بت جيرانه يحبها و هي ما منطيته عين لأن تحب فارس احلامها راكب على زمال (تكرمون) و اسمه رامي لو ع الاقل تامر و تريده رشيق و عنده عضلات و يفرفرها بشوارع بغداد و ما يتدخل بالسياسة و ما يجيب طاري الحكومة و يعاملها مثل مهند و نور. 

و شالعة گلب تحسين يوميه ب٢ و نص يعوف المحل و يوگف بالركن جوه الشمس و المطر و يوگف بنص الطين و الخيسة علمود صابرين تفوت و تباوعله صفح و هو ما عنده كرامة يگولوله يابه عوفها هاي فايخة و هو لازگلها لزگة جونسن الي يحطوها بالظهر حتى يصير زين.

و فد يوم لگاله صيدة حلوة وحدة طاگة و تريد تتزوج اي واحد حتى لو مشلول طبعاً اتعرف عليها بالفيس بوك حاله حال العراقي البسيط عنده ٥٣٠ صديق تلث ارباعهم بنات و نص هالبنات شباب مسجلين باسامي بنات و حظه الحلو فتح الفيس و لگه المرة فاتحة و قرر يطبلها خاص. 

وره ما عرف كل حياتها و الفلوس الي عدها و عمرها بالخمسين يعني راضية بالقسمة و النصيب اخذ رقمها و انطاها رقمه  و بعد سنة من الكلام و المخابرات فكر ويه نفسه صابرين ما تفيده و ما رح يستفاد شي من انتظار موافقتها و لازم يشوف مستقبله و يأمن حياته خصوصاً شغل الفيترچي صعب هالايام.

بس شيخلصه منها بعدين و شلون ياخذ الفلوس و اول مرة يفكر بهالطريقة عاش حياته فقير بس عمره ما مد ايده على خبزة احد لحد ما الله وفقه اشترى محل بالشيخ عمر بفلوس انطاها اله تاجر سافر و گاله اذا ما رجعت خلال سنتين الفلوس حلال عليك و بقى ضام الفلوس و الرجال ماكو و قرر اخيراً يصرف الفلوس و الحمد لله على كل حال.  

صار الزواج و عاش تحسين ويه زوجته الجديدة ببيت مساحته ٦٠٠ متر شهرين و وراها سافرو لكندا و بفترة الانتخابات رجع و صوره مالية الشوارع ! يابه تحسين ابو الليل صار اسمه الدكتور تحسين الفلاني و زوجته طلگها وره ما نصب عليها و خلت كل الاملاك باسمه.

و فاز بمقعد بالبرلمان و صار مشهور و سمعت صابرين بالخبر و غمت نفسها و غمت قسمتها السودة من تزوجت واحد رشيق اسمه وائل بس عطال بطال و من الچرباية للقنفة ما يسوي غير شي.