‫#‏من_چنت_صغير‬ .. بأيام الإبتدائية چانت المدرسة مالتي بيها دوامين ، صبحي وظهري ..
بأيام اللي چان دوامنا ظهري چنت اني وأصدقائي ندخل للمدرسة أول الناس ونگوم نفتر بالصفوف وندور بالرحلات على الأقلام والمساحات والمقاطيط اللي چانو ينسوها طلاب الدوام الصباحي برحلاتهم ..
چنت يومية أفتر بالصفوف وأدور بالرحلات ويومية الگه أشياء وأخذها وچنت كلش أكيف بيها ..
بيوم من الأيام هم دخلت للصفوف أدور بالرحلات وچان الگه قراصة مال شعر صغيرة ملفوفه بكلينسايه ومشموره بوحدة من الرحلات ..
اني أول مفتحتها وشفت القراصة رأسا لفيتها وخليتها بجيبي وكيفت بيها كلش وبقيت خالها بجيبي طول اليوم وأريد بس يخلص الدوام ونطلع حتى أنطيها لأمي تستفاد منها ..
عاد من خلص الدوام رأسا ركضت لأمي وگلتلها : يمه يمه غمضي عيونچ جبتلچ هدية ..
أمي غمضت عيونها ، اني طلعت القراصة من جيبي وخليتها بأيد أمي وگلتلها فتحي عيونچ ..
أمي أول مفتحت عيونها وشافت القراصة بيدها رأسا شمرتها وكفختني حيل وصاحت : هاي شنو ولك وين لگيتها ؟!
گلتلها : يمه هاي قراصة مال شعر لگيتها بالرحلة وجبتلچياها !!
گالت : ولك أخذها وروح ذبها بالزبالة لا أطيح حظك ، ولك هاي صره مال طفل مو قراصة ..