أيام گبل أغلب الناس بالمناطق الشعبية مچانو يدزون جهالهم للحلاق ، چان أي واحد چبير بالبيت يلزم مگص ومشط ويزين الجهال وينتهي الموضوع !!
#من_چنت_صغير .. چان أكو يمنا رجال جيراننا أسمه أبو ماجد ، هذا أبو ماجد چان صديق أبويه كلش وچان بكل عيد يلزم جهاله ويزينهم بيده ..
بيوم من الأيام أبويه راحله ، گله : أبو ماجد باچر عيد وجهالي شعرهم طويل أريدك تزينهم زيان مرتب !
أبو ماجد گله : أي تدلل دزلياهم خل أزينهم ..
عاد أبويه دزنا اني وأخويه الأكبر مني گللنه روحو لأبو ماجد خل يزينكم زيان العيد ..
رحنا اني وأخويه لأبو ماجد ، أبو ماجد طببنا بالحديقة مالتهم وشال أخويه الچبير وگعده على قنينة مال غاز وگله : بابا شلون تريد أزينك .. تريد گصة الهايشة لو گصة الدب ؟!!
أخويه رأسا گله : لا عمو أريد گصة الدب لأن باچر عيد وأريد أكشخ بگصة الدب ..
أبو ماجد لزم المگص والمشط وگام ينتف بشعر أخويه ، اني من شفت البدايات مال گصة الدب گلبي گام يلعب ورأسا گلت لأبو ماجد : عمو راح أروح أشرب مي وأجي ورأسا أنهزمت !!
اني خلصت النهار كله مهزوم ، وراها رجعت للبيت بالليل ، دخلت وچان الگه أخويه گاعد بالغرفة الأخيره بالزاوية ومطفي الأضويه وگاعد مگنبص مثل الأسير ولابس كاسكيته خاكي مال جيش الشعبي مالت أبويه وخطية يبچي ويشهنگ !!
اني من شفته گتله : ها شبيك ؟!
گال : ولك همزين إنهزمت ، شوف گصة الدب مال أبو ماجد ، وخطية رأسا نزع الكاسكيته وچان يطلع راسه عبارة عن صلبوخ ، أگرع ومطبر عبالك طاگة عليه عبوه !!
گتله : أي صوچك چان گتله أريد گصة الهايشة چان أقلها عافلك شوية من الگذله !!
وخطية بقى العيد كله أخويه لابس كاسكيته مال جيش شعبي والجهال تصيح عليه أگرع مگرگع نام بالطاسة يبچي على أمه يريد خرخاشة ..