ملاحظة :. اعتذار شديد لكل الأخوة والأخوات لأستخدامنا لفظ خادش للحياء في هذا المنشور .
گراص الخصاوي هو اسم يطلقه العراقيون على حشرة قارصة يسميها البعض ام السبعة وسبعين او الاربعة والأربعين ، والحقيقة أني مااعرف شنو علاقة هاي الحشرة بالخصاوي خصوصا اذا ماعرفنا ان هاي الحشرة من خلقها الله لليوم ماگرصتلها خصوة واحد .. حشرة مگرودة مسالمة لا تهش ولاتنش ، اتذكر من چنا ازغار كان اكو گهوجي بمنطقتنا سرسري كلش وحشاش واگفين يم الگهوة مالته اتعدت عجوز هيه وبناتها ومر يم العجوز گراص الخصاوي ، فالگهوچي گال لابنه بوية انطيني انعال خل اكتل هذا الگراص ، العجوز وهيه ماشية گمزت صاحت يبوووه الحگولي ولكم لا يگرصني ' التفت عليها الگهوچي گالها حبوبة ليش تصيحين انتي ياهو اليمچ ؟ گالتله يحبوبة لا يگرصني ،، گاللها شيگرص منچ يحبوبة اذا انتي هبياض .....
هسه خوية ذاك الرجال التعرفونة مثل گراص الخصاوي لا يگرص ولايعض والعجايز خايفة منه... العراق كله سقط من ورة حكومته وهوة مگظيها تسرسح على حيطان وحفور المنطقة الخضراء
لذلك اتصور ان افضل لقب يطلق على حكومتنا الرشيدة السلمت شبابنا واسلحتنا وارضنا لداعش هيه حكومة گراص الخصاوي الوادم كلها خايفة وهيه عمرها ماگارصتلها واحد ..
مع تحيات خالكم ابو عليوي
