هذا هو الخليفة البغدادي اذن .. بلباس وعمامة سوداء مثلما كان الخليفة يطلع علينا بالافلام والمسلسلات الدينية التاريخية . هذا الخليفة الاسلامي الذي سوف ينشر رؤوس الكفار في كل مكان .. كل الكفار بلا استثناء وتصل طلائع جيوشه الى باريس ويسقط برج ايفيل بعد تدمير قبور الشرك في الموصل .!!!
اكثر من مليون شخص شاهد خطاب الخليفة خلال 24 ساعة على اليوتوب واكثرهم من المسلمين والعرب وربما الان ارتفع الرقم الى اكثر .. اكيد العرب والمسلمون يتابعون هذه الافلام الهندية مثلما يتابعون صور لنساء شبه عاريات من بلاد الكفار ... اكيد اغلبهم قالوا ياليت يدخل بيتنا الخليفة ونكون من جنوده ضد الكافرين . 
لكن الخليفة اعلن عن تحريم دخول الكافيه والفيسبوك و شرب السكاير والنركيله والحفافه و مشاهدة صور النساء شبه العاريات ؛ ثم اعلن لايجوز الدخول الى الفيسبوك او تويتر او اي جات بدون حضور محرم ... لكن لحد الان لم تأكد حكومة خليفتنا الحجي في بغداد هذه المعلومات لانها مازالت تحلل في مقار اجهزتها المخابراتية والاستخباراتية هل ان هذا الخليفة هو نفس البغدادي ام لا ... ايباخ ايباخ ايباخ .
ظهور الخليفة البغدادي انعش الكثير من الافكار الدينية السلفية و الشيعية ايضا حيث صرح عدد لابئس فيه ,,, اذا هذا البغدادي هو السفياني اذن اين اليماني ؟؟؟ 
ثم شاهدت والعباس عم النبي فليم قصير حول الاحداث والخرائط وتوقعات ربما تحدث الان او غدا او بعد الف سنه حسب التقرير العسكري التاريخي للحركة المهدوية ، حيث الجيوش تتقاتل من الشام الى السعودية الى تركيا الى الكوفة الى خراسان ... بس اني ما اكعد راحة .. قلت لنفسي جا اسرائيل ماكو بالخريطة ؟؟؟ طيب وين الصين والهند وامريكا .. جا هو العالم بس هذه الدول ، اقصد الشرق الاغبر ؟؟؟ عموما محد رد علي لان القضية دينية مقدسة .. اي والعباس عم النبي ؛ قضية دينية مقدسة .بس الفرق كل واحد من الطرفين يقول انا على حق والفئة الناجية والاخر الى جهنم وبئس المصير .
خلونه نرجع الى الخليفة .. ماعلينه بالقضايا المقدسة الان ، بس واحد من اصدقائي نقل لي التالي : 
انه كان يشاهد فليم الخليفة الهندي واذا الحجية والدته سمعته يشتم ويلعن .. قالت الحجية : ولك عليمن تشتم السيد ابو عمامة السوده عمت عينك ماتخاف من جده رسول الله وجده الحسين ؟؟
قلت لها يمه هذا زعيم داعش ... الحجية قالت جا داعش هم عندهم ساده ..؟؟؟. واضاف والعهدة عليه .. يمه صدك السالفة ضارطه .!!!!
المهم ؛ نرجع للخليفة البغدادي ، شخصيا سمعت خطابه 4 مرات .. على اساس محلل نفسي وسياسي والخ من سوالف الفضائيات العراقية والعربية ... بيني وبينكم ولا تبلغون اجهزة المخابرات والاستخبارات مالت الحجي خليفتنه في بغداد ... خلوه سر ولا تشغلونهم بتقرير سري لان خطية مازالو يفككون اللغز .. 
اني كلش عجبني المسواك . اي بشرفي عجبني المسواك والاخراج السينمائي للخطبة والصلاة هواي احسن من فليم الرسالة ... خرب عرضكم اليهود كل سوالفكم بالاخراج والتمثيل مضبوطة .. عمي محترفين والعباس عم النبي محترفين جا قابل مثل اللطامة في العراقية . الله يطيح حظ السمج ابو زريده . والمسكوف والمسموطه ...
العجبني الاكثر في الخليفة انه هادئ وناعم ، يعني مثل واحد مطلعينه للتو من مكان بارد وكان مسافر الى شلالات نياكر- خليفة .. يعني جهاد نكاح وكلاوات مال مقاومة شرسه ماكو !!!! 
اي بالعباس عم النبي الخليفة كان متروس دلال وغنج ويمكن حاف وجناته الحمر . بس بيني وبينكم اني كلش مرتاح لان الخليفة طلع سيد حسني وكلش ارتاحيت من شفت عمامته السوده ، يعني طلع ابن عمي هو حسني واني حسيني ومنين ما ملتي غرفتي .... حظوظ خو مو مثل الشروك والمعدان وثوار العشائر قبض ماكو . 
تدرون اني كنت اشاهد الخطبة والصلاة ويداي على قلبي ، خفت يدخل الجنرال احمد المالكي الى الجامع وتصير مذبحة ، بس الحمد لله ابو شهاب كان عاقل والخطبة انتهت على خير .!!!!
رمضان مبارك