هادي هاشم ابوه مات بقمة الحصار وجان الجوع مستشري والوضع كلش متعب ولاهو ولااخوانه عدهم شئ يقتاتون عليه سوى وظائفهم اللي جان بيها الراتب الشهري دولار ونص ،لذلك اخوانه ورا مامات ابوهم كَالو لهادي باعتباره الجبير خويه نتعازل هذا حدنا مع بعض صارت عدنا فروخ ونساوين تتعارك.
انباع البيت وطلعت حصة هادي 90الف.
اخوان هادي اشتروا بيوت متهالكة بحصصهم وهادي راح للرفاعي اشتراله خمس مطايا وحملهن ببيكب وراح للحي لمعامل الطابوكـ خلاهن بمعمل ورجع.
ورا فترة هادي ترك الوظيفة وجان معلم بمدرسة النبعة وظل يدخن جكاير مدري شنهو اسمها ويلبس كله قمصان بنفسجي وبرتقالي وطول النهار كاشخ ويكعد بالكهاوي.
انا هادي صديقي كلش وعود الصداقة الحقيقية بالجنوب تفترض الحدة والحرص الشديد لاكيت هادي بالسوكـ وغميته عود حريص فكالي شبيك ليش تغمني فكلتله لانك مابيك حظ راح تصرف فليسات البيت وتظل تجدي اي رجولة ماعندك وكل شئ ماتفتهم ولك شلون تترك الوظيفة صح مالهاش قيمة بس يجي يوم تتعدل وليش نهار كله كاشخ ها خلصت الفليسات جالق وبالق؟
كالي خايب انت ماتفتهم جا ماتشوف صماخك شكبره دتعال احاجيك.
فاجبته يلا فهمني تراني محتركـ كَلبي عليك
كالي خايب راتبي كمعلم الف وميتين دينار و فليسات البيت اشتريت بيهن خمس مطايا وشغّلتهن بمعمل طابوك الحي كل مطي ينطونه راتب 6000 واكله وشربه على ابو المعمل لانه ينقل عليهم لبن وطابوك...يعني المطي الواحد يعادل رواتب خمس معلميه جا بعد شسوي رايح يومية 20كم للنبعه وتعبان وكل فايدة ماكو لان انا هسه باعتبار عندي 25 معلم يقبضون راتب ببيتي.
هسه كعدت حسبت راتب عضو البرلمان العراقي لقيت العضو الواحد يعادل رواتب 103 معلم
طلع البرلماني احسن من المطي
Naji Abbas
