شوفو يا عراقيين أبو سراوي شكاعد أيسوي بينه وبالعراق المعفن ..حس نفسه راح يبقى وحده..كام يتوسط  بألايرانيين حتى أيرجعون الكورد والعراقيه للحكومه.. وتعالو باوعو الطيارات خري مري من أيران ..ويتوسلون بالريس البرزاني حتى أيسون لقاء يجمع أبو سراوي بيه.. بس أبو مسرور أيكول هم أنسوي ويه أبو سراوي أتفاق وبعد شهر لو شهرين يضرب هذا الاتفاق عرض الحايط.. وكولو زيزي.. والله ملينه منه.. شوفولكم غيره يعني هذا البلد ما بيه بس المالكي ..أتشوف أبو سراوي أول مره كله معلك ويصير عصبي ويحجي بحيل صدر.. وبعد يومين أيفك لاستيك التجه ويخرط  وتعال يا جعفري ويا حكيم خلصوني من الورطه.. وهو بكلبه ميريد أيشوف لا الجعفري ولا الحكيم ولا الصدر.. ما أدري من يا مله هذا الرجل ..والامريكان والايرانيين كاعدين بس أيركعون بزروف أبو سراوي.. وهمه أمكيفين على هيجي وضع ومقندلين ..أو خلي أنكول هذا هو الاتفاق وياهم..حتى أيبقون العراق بفوضى..وهمه يشتغلون عالخفيف وعالبارد..

وكلها بجفه والشك الجديد اللي راح يستلمه أبو سراوي من زعيم التيار الصدري بجفه.. يعني بأجتماع مجلس الوزراء القادم مراح أيشوف خمسه من وزراء الصدر بالجلسه.. صدك جذب ..هسه ضرطت من صدك .. طبعا أبو سراوي مغلس على مقتدى الصدر وميريد يسمع بأسمه .. ويكول بكلبه روحه بلا رجعه.. ما أدري ليش يكره الصدريين .. وهمه سبب صعوده للسلطه ولحد الان أيكدرون أيكلبون الطاوله المستديره على أبو سراوي.. بس لو أعرف ليش أيضوج منهم ..

توصل الاجتماع الثلاثي اللي صار أبيت الجعفري بخصوص الكورد .. وحكومه أبو سراوي راح تنطي كل ما طلبه الاكراد ..فلوس الشركات النفطيه والبيشمركه وتصدير النفط الكوردي..كل هاي حتى يرجعون للحكومه..بس الكورد أيريدون تطبيق الماده اللي لا المالكي ولا اللي يجي بعده راح أينفذها..بأستطاعة أبو سراوي منح الكورد كلشي بيه فلوس..بس من توصل للمناطق المتعارك عليها أبو سراوي أيحط نقطه ويروح راس سطر..

الوضع يا جماعه كلش خطير..بس المبلل ميخاف من المطر..أنكس من اللي صار شراح أيصير بعد..أشو أحنه شعب شاف الويلات وماكو مثلنه شعب طاح حظه..من وعينه للدنيه ولحد الان عشنه الاوجاع وعرفنه الدم وراحت أجيال وأجتي أجيال وراح تجي بعد أجيال وما تنتهي لغة كطع الرؤس والكواتم..هذا الشعب أتعلم عالهوسه من سياسيه الحفلك اللي أيبوك ويروح للحج واللي ينضربون بالقنادر ويرجع يحجي ولا كأنما صاير شي..ذوله لا كرامه عدهم ولا حياء..

شوفو أنفصام الشخصيه اللي يتمتع بيها أبو سراوي..يطلق سراح السعوديين والتونسيين والليبيين اللي فجرو سيارات وكتلو الناس بحزام ناسف وأباحو الدم العراقي ويجازيهم المالكي بأطلاق سراحهم..وشوفو الاعتقالات العشوائيه والابرياء من هذا الشعب الخايس القابع في سجون المالكي العلنيه والسريه..وشوفو أبو سراوي ويه نظام البعث السوري شلون يتعامل ..ويه شعبه شلون يتعامل..يعني واحد أيتاجر بالدم العراقي حلال واللي برئ ومعنده شي وتشوفه بالسجن..ويظل عالمساومه وهو برئ يا عالم..

وما خفي كان أعظم