كلش مو حلو منك يا حسن العلوي..لالالا عيب هذا الحجي..أنت كاتب معروف وعندك تاريخ طويل ..لا تصير مثل المتلونين والشواذي .. مره هنا ومره هناك ..ليش هذا الافتراء والتجني على ريس كتلتك السابق..مو دفاعا عن المالكي وهو مو بحاجة حتى واحد مثلي أيدافع عليه ..بس للتاريخ والامانه ..هل المالكي  وحده المسؤول على خراب العراق..نعم هو ريس وزراء ويتحمل كلشي بس أكو وياه من كل الاحزاب .. من العراقية والكورد والتيار الصدري .. وكل هاي النمونات اللي أدخلها الاحتلال.. كلكم مسؤولين ولازم تتحملون فشلكم وتخبطكم بأدارة العراق وكل قطرة دم سالت هيه بركبتكم .. يا أخي ليش هسه تحجي وتحمل بس ريس الوزراء ما أيصير بهذا البلد.. طيب بعد ثمان سنوات أدكول المالكي هو المسؤول عن أجهزة كشف المتفجرات الفاشله وهو اللي بنى مدارس تعبانه وهو اللي رجع البعثيين الضباط .. لعد وين جنت يا حضرة النائب ..أنت مو واحد من ذوله السياسيين أيها العلوي .. اللي باعو وطنيتهم وضميرهم وراحو وره الامتيازات والشهوات .. وجاي هسه دكول المالكي هو اللي أدخل الارهاب.. هاي دعاية أنتخابية مبكرة للتيار الصدري يا العلوي ..واللي أدخل الارهاب للعراق وذبح العراقيين هو أنتو كلكم  .. صفقاتكم المشبوه ..ولغفكم من المال العام ..وجريكم خلف الملذات.. وتناسيكم للشعب هو من سمح للارهاب بالدخول ووجد حواضن بهذا الوطن .. خيانة الوطن تجي من خيانة المواطن يا سيادة النائب وأكله أموال السحت الحرام .. لا دكول أني مو مشترك وياهم وتذب الصوج على الاخرين.. هاي أحنه بوكت اللغف وياكم ..بس من توصل السجينه للركبه دكول أني شعليه..أني مو وياهم

وأحب أذكرك يا حسن العلوي بحديث عن البعثيين العراقيين من ضباط الجيش السابق كلته حضرتك بوكت سابق..مو كل ضابط بعثي هو مجرم ولا كل موظف هو  مجرم .. واللي تلطخت أيده بدم العراقيين معروف يا حضرة النائب..وأنت بعثي سابق وبعثي جبير ..  هل من المنطقي نشيلك  ونكعدك بالبيت ونحرمك وعائلتك من كلشي ..هذا مو خوش حجي ..أنت أذا تريد تخلق مجتمع حر مو بالضرورة  تجريم أنسان بفعله الماضي لان هو مو مسؤول عليه.. جان أكو وضع يجبر العراقيين على قول نعم  والتوقيع بالعشره وأنت سيد العارفين..وأذا بهاي الصورة نشتغل ,معناها 87 بالميه من الشعب العراقي لازم نحرمه من العيش ونطرده بالشارع ونخلي البطاط  يقتص منه بطريقته.. هذا مو حل يا حسن العلوي..

نعم ..لا المالكي يمثل شيعة العراق ولا النجيفي يمثل سنة العراق.. وهاي الروافض والنواصب يعرفوها كلش زين .. وهم هاي القوانه بعد ما تعبر على العراقيين.. والانتخابات الجايه اللي على ما يبدو كل هاي الاحزاب العتيده متحضرة ومشلهه وعلنت النفير العام ويا ستار منها ولازم تبحث عن طريقه شلون تصطاد الناخب حتى أيصوتلها .. بطانيات , مسدسات , ثلاجات , أجهزة تكييف , أجهزة موبايل ..تشغيل عطاله بطاله بالشرطه لو بالجيش .. شلون ما جان ..بس المهم الناخب العراقي يجي ويصوت للحزب اللي ينطي رشوات ثكيله ..وأكيد راح تلعبون بالشعب جوله من وره خلافاتكم المفبركه وأفلامكم القديمه والمستهلكه ..بس كافي تخدعون هذا الشعب اللي ذاق الامرين منكم .. وأنتظرونا يوم الانتخابات.. وبعد ما نعض أصابعنا ندم ..وما خفي كان أعظم