البارحة قررت اروح للسينمه لان كلش تعبت من اعلام اللطامة . اشتريت البطاقة بس ما انتبهت لأسم الفليم .. شلون مصيبة طلع الفليم هندي واسمه " حكم بن القرية " . عاتي صار لي عشرين سنه ما شايف فليم هندي .
في الذاكرة ينقسم الفيلم الهندي الى ثلاثة فصول وخاتمة ؛ بعدين البطل مايموت ويصرخ بالنهاية ما اطيها الا خراب . فكرت بصوت ناصي ؛ قلت يمكن خطة الاخراج والانتاج الهندي تغيرت بعد كل هذه السنين !! تبين لا والعباس عم النبي نفس الطاسه ونفس الحمام ماكو اي تغيير .
الفصل الاول :
قصة الفليم تجري في قرية فيها فلاحين ؛ الامية والجهل صاعدة نسبتها لبو موزة ، الناس من طوائف مختلفة ، واحد يعبد بقر , ثاني فاره , اخر ينتظر بوذه يرجع ويحقق العدل والانصاف بين الناس ، بس كل واحد على دينه ، موسى على دينه وعيسى على دينة وماكو مشاكل .
شيخ القرية هم حباب عنده روح ديمقراطية معقولة ؛ بس الرجل ابدا ما قال بعد ما اطيها . والعباس عم النبي ما سمعته من بداية الفليم الى اغتياله قال مفردة ما اطيها . 
المهم ، بالقرية طلع واحد لابس احمر ، ورايته حمره ، وبيدة كتاب جايبه من الخارج وراح يشرح للناس انه لازم يصير عندهم جاكوج ومنجل ونجمع المحصول ونوزعه على الجميع , يعني اشتراكية , خوش اي اشتراكية .!!!! . تنظيمات وخلايا سرية ، بعدين صار انقلاب مسلح على شيخ القرية قتلوه هو واطفاله .. واشتغل الفرهود , واشتغل العنف ... المصيبة الكبرى على قول احد الفلاحين ( ادري انتم قلتم توزيع المحاصيل على الجميع ... زين ليش تتحرشون بوذا وتنفون وجوده وعودته !! خرب ربكم )؟؟؟!!!!
طبعا صارت مذابح وسحل بشوارع القرية وكفرت القرية بالمنجل والجاكوك ، طبعا مو كلهم ضد المنجل بس جماعة بوذا . 
الفصل الثاني :
المخرج طلع ملعون والدين ، فنكم شنو سوى ؟؟ اني كلش انشديت لهذه اللقطة , المخرج رأسا طلع شخص ثاني هم عنده كتاب وعنده شوارب على شكل رقم ثمانية شباط وخطب بأهل القرية قال لهم: ( عمي احنه كلش نحترم بوذه وكل تعليماته على راسنه و راح تصير اوامر بس ثانوية , احنه راح نبعث الامة من جديد بتراث هذه القرية العظيمة التي ذات يوم كانت خير امة اخرجت للناس وصلت حدودها الى فرنسا ) ، صفقت الجماهير الفلاحية وخطب بيهم واحد قال لهم : ( اليوم عليكم يا انصاري ان ترجعوا الى غرف نومكم وتنامون مع نسوانكم لقد سقط الكتاب الاحمر وزعيمه ) . طبعا صار التصفيق والهلاهل والاهازيج بالهندي .
ثاني خطب بأطراف القرية قال : ( بعد ممنوع واحد يسميكم معدان ، كل واحد يسميكم معدان يعني هو عجمي مكطم ، تكسر عظمه يطلع خره ) .
طبعا اني اتابع الفليم الهندي وحاط ايدي على خذي ، لك هذا شلون نغل المخرج !!
المهم ؛ منذ وصول جماعة ابو شوارب الى ظهور بطل الفيلم ، القرية ماكو بيها راحة , مظاهرات , هوسات , اجتماعات حزبية , بعدين وزعت الحكومة ملابس زيتونية على الفلاحين ورشاشات , ودك وركص للصبح .. احلى لقطة لبطل الفليم بيده بندقية ويشرب سكار كوبي وعلى راسه قبعة كابوي على شرفه يستعرض قواته ويرمي من الصبح لليل . اي بشرفي احلى لقطة هاي كانت بالفليم !!!

يا يابه شطوله الفصل الثاني من الفليم !! صدك فليم هندي ، حروب داخلية وخارجية بعدين المخرج هم لعبة نفسه من الحرب والقتال قرر يغير بطل الفليم ويجيب شخص اخر .. بالمناسبة بطل الفليم يصرخ ابدا ما اطيها , راح اسلمها خراب . بعدين جابوه لحبل المشنقة وراح بولة بشط .
يابه دروح جا هي بكيفك ؟؟؟ هي بكيف المخرج والمنتج !!!

الفصل الثالث : 
موسيقى تصورية تشك شك ، بعدين جنود اجانب تسقط تمثال الزعيم ابو شوارب ، بس المصيبة نفس الفلاحين مال القرية اللي كانو يهتفون لبو شوارب هجموا على بيوت الحكومة وفرهدوها حتى راس تمثال الزعيم محد يدري بيه وين صار ؟؟!! اني مقهور كلش على حصان الزعيم الذي كان حصانا ابيضا , خطيه حتى هذا صار حصان يجر عربانه في ساحة القرية !!!!
لك شلون مخرج هذا ؟؟؟ لك هذا دمرني دمار ؟؟ لك هذا شدني شد للفليم ؟؟ !!
قرر المخرج يسلم السلطة لجماعة بوذا وجماعة ثانية تسكن في مرتفعات القرية بس ما لابسين سراوييل .. اي المخرج بكيفه مو بكيفي ؛ اني بس انقل لكم احداث الفليم الهندي، بشرفكم ابروني الذمة .!!! جان يصيح واحد :
طيب يابه وجماعة ابو شوارب ؟؟ 
المخرج يكول ما عليك بيهم يجي وقتهم بعدين ؟؟؟ شوكت بعدين ؟؟
طبعا القرية صارت هيته وفوضى كلمن ايده اله؛ لكن المخرج ما قصر راسا طلع قايد ضرورة جديد للقرية من ابنا ء القرية نفسها ، بس كان بالخارج يتاجر بالسجاد والتحفيات , خطب بيهم قال : ( انا بوذا الذي تنتظرون ) ؟؟؟ ايباه . ايباه ؟؟
صاح احد شيوخ الاسناد عليك بوذا لا تطيها !!! قال بطل الفليم : ولك شلون بعد اطيها ؟؟ 
طبعا اكو شاعر شعبي كان يكتب قصايد لحكومة ابو شوارب سابقا رأ سا كتب قصيدة اسمها بعد ما نطيها !!!
بطل الفليم اصلع شوية بس المخرج ابدا ما يخليك تنتبه للصلع مالته , مخرج عظيم بشرفي , الكارثة مو بالصلعة مالت بطل الفليم ؛ الكارثة المخرج هو والمنتج اتفقوا على اعادة جماعة ابو شوارب للمشهد حتى تصير مذبحة .!!
جماعة ابو شوارب هذه المرة مو زيتوني . .. لا عيوني لا ؛ لابسين ملابس خير امة اخرجت للناس ، ورافعين شعارات بوذا ، بس على خلاف مع بطل الفليم . يمكن اكو بوذا يمين وثاني يسار ؟
بشرفي تعبني المخرج ,و كلش تعبني ، تعرفون ليش ؟؟؟ لانه حصر بطل الفليم بنفس الخانه السابقة التي انحصر فيها ابو كتاب الاحمر وابو شوارب ، وصاح يعني راح تطيها وغصبن عليك !!
هاي شلون !! بس بطل الفليم صاح ابدا ما اطيها في لقطة وهو يمسك بحبيته التي كانت تنزف دما .... شكثر بجيت على بطل الفليم ...؟؟؟ بس المخرج الملعون بالنهاية طلع واحد ملتحي وبيده راية سوده قال لبطل الفيلم وهو رافع اصبع ايده الاوسط : كول زيزي اريد اشوف شلون ما تطيها ؟؟؟؟
صدك جذب لك هذا هذا غير فليم ؟؟؟
رباط الحجي : 
ابدا بعد ما اروح اشوف فليم هندي وهذي قبعتي ارفعها للمخرج الهندي وللفيلم ( حكم بن القرية ) . اني نصحتكم وبعد ما عليه ، دير بالكم تشوفون فليم هندي !!!