ألأغلبية مِنْ أنصار السيد المالكي لم يعد لديهم مُنجز حقيقي ملموس يتفاخرون بهِ لهذا الرجل سوى التوقيع على إعدام جرذ العرب صدام...
نعم إنه إنجاز عظيم للسيد نوري المالكي....
دقيقه..إنجاز على شنو،هو غير رئيس الحكومة ومِن واجبه يوقع على إعدام صدام أو غير صدام،لأنه موظف بالدولة وياخذ راتب على هذا العمل،يعني حاله من حال وزير البلديات مِن ينظف الشوارع،وحاله من حال وزير الخارجيه مِن يفتتح سفارة جديده بدولة اجنبيه،وحاله من حال وزير الصحه من يستورد أجهزة طبية حديثه...
لا طبعاً...ففي ذلك الوقت كل المسئولين هربوا من التوقيع على إعدام الطاغية ولم ينبري له سوى السيد نوري المالكي...
هَم دقيقه...منو هرب؟ طيب لنفرض إن نواب رئيس الجمهورية آنذاك وهَم طارق الهاشمي وعادل عبد المهدي بالفعل هربوا،ورئيس الجمهورية جلال طالباني "أبو گلب رهيف" ما يؤمن بعقوبة الأعدام،ولكن هل جربنا شخص كان يجلس على كرسي رئاسة الوزراء ورفض التوقيع على إعدام صدام ومن بعدها تم تنصيب المالكي رئيس الوزراء وقام بالتوقيع؟!...
أقصد جِبنا رئيس وزراء(س من الناس)وخاف ما وَقّع،وبعد فترة تم التوافق على(ص) من الأشخاص يصير رئيس وزراء وهَم ما وَقّع، ومن بعدها (ع)ثم(ح)ثم(خ)ثم(ر)ثم(ز)وكلهم خافوا وما دبروها وجبنا السيد المالكي ودبرها؟؟
يعني لو كان باقر جبر رئيس الوزراء معقوله ما راح يوقع على إعدام صدام؟أو مثال الالوسي؟أو حسن السنيد؟أو أحمد الچلبي؟أو وائل عبد اللطيف؟أو هادي العامري؟أو قاسم الأعرجي؟
أعتقد وصلت الفكرة عزيزي الناخب ما يحتاج أدوخك أكثر....وإنتَ بكيفك بعد..