طشينه الورد صار اعلى كَدك ثوب
وكَصير الثوب الاسود مارهم كَدك
ورد ارجع وطن مايشبه التابوت
وبضحكة اطفالك ينمسح خدك
شمس ياموطني وماكدروا ايطفوك
معاولهم شمع ماكَدرت اتهدك
على النهرين ردت والنوارس بيض
صبغوهن بلون كَلوبهم ولدك
هاي الله أكبر رفرفت بالغيم
ورددنه النشيد وياهو اليردك
يبو تاج النسر ياتاج راس الكون
غصباً عالعرب تتنومس أبمجدك
شردنه الثعالب كلهه ذاك الصوب
وضل صيت اسد بابل واكَف ابحدك
يبو طين البخت ينطي اليزرعه مراد
وحتى الخير ياخذ خير من عدك
رد هورك بحر والكَصب ينطي فياي
والخاف وتعب يتمدد ابسدك
وهذا النخل واكَف ماوكَع عالكَاع
وهاي السفن كلهه اتغازل بمدك
وهذا الكَلته كله هواي بي مكَلوب
جا يمته نشوفه والوضع يصلح
أنه مادح وطن بي بيت ابو الحسنين
بس يم القصور اشعاري لا..تجرح
نقلتلكم خبر مسموع عالشاشات
سمعت الراس الاكبر بالوطن صرح
شنو تريد انه امدحك لاأعذرني بهاي
امدحك وارضه عنك عود من تنصح
ولك ماريد أجرحك شعري باشط حيل
ولاخايف أسولف بالحجي اليفضح
أبكَلبي أسرار كلفه ويعرف المضموم
يهد عرشك يذلك لوصدكَ يفصح
أنه عندي المهم كوخ الفقير ايدوم
ورد عالبيت الأبيض بالفكر هدمه
ضل ابمنصبك ماعندي شي وياك
بس أرجع عراقي والشمل لمه
أنكسر كَلب العراق شلون ياهو الكَال
يخسه موكسر بس الحصل ثلمه
كلهم موثقه والتسميات أشكال
المذاهب من ذهب بس العراق أسمه (السمو)
أنصحك بالوطن ياسيدي المسؤول
لشفاف الوطن بس رجع البسمه
ترجع من جديد أجيال تحيي أجيال
يعمرون الوطن من راسه حد جدمه
